Breaking News :
  • NO BREAKING NEWS
Ekspertonan di rònt mundu huntu na Boneiru pa e konferensia tokante dinámika di kostanan karibense i durabilidat
2016-10-17 08:14:41 -
Boneiru
0
278

TNO, The Planet Earth Foundation, Tourism Corporation Bonaire i NEXUS 1492 riba 17 oktober 2016 durante un evento públiko, lo duna e inisio na e konferensia di trabou ‘Coastal Dynamics and Ecosystem Change’ (Dinámika di kostanan i kambio di e ekosistema). E konferensia ku ta ta tuma lugá di 18 te 21 di òktober na Plaza Beach Resort Bonaire, ta trese ekspertonan klave for di rònt mundu huntu pa yuda ku e agènda tokante desaroyo duradero di kosta den e region karibense dal un siguiente paso riba e kaminda.

Tin un evento públiko planiá na El Mundo Restaurant riba 17 di òktober 2016, di 18.00–20.00 or. E organisashon ta ofrese ‘welcome drinks’ komplimentario. E evento akí ta konsistí di presentashonnan di parti di Maurice Adriaens (Tourism Corporation Bonaire), arkeólogo Jay Haviser (SIMARC) i e embahadornan di naturalesa, Julia Marisol Martinus i Rayen Seraus (Junior Ranger Program STINAPA). Durante e evento oradornan lo diskutí e importansia di protekshon di e kostanan di Boneiru i e papel ku e konferensia ta hunga pa loke ta trata estudio di durabilidat di e kostanan karibense. Durante e evento lo tene tambe un kompetensia di arte pa muchanan i famianan. E ganadónan lo ser anunsiá na final di e anochi i lo risibí un premio spesial. E obranan ganadó lo ser eksponé den Museo Terramar na Kralendijk.

E konferensia akí ta un oportunidat úniko pa atendé e problemanan akí, pasobra e ta trese huntu un tim eksepshonalmente fuerte di ekspertonan internashonalmente rekonosé riba tereno di siensia di tera. E konferensia, prepará pa un tim ku ta konsistí di ekspertonan riba tereno di arkeologia, biologia, siensia geológiko i físikonan, ta enserá un skala amplio di ekspertisia altamente kualifiká riba tereno di siensia di sistema di tera.

E 23 000 km di largura di e zona kostal karibense ta den un balanse delikado. Karibe ta ser konsiderá komo un di e regionnan mas vulnerabel di mundu, mirando e influensianan di desaroyonan riba ekosistema i komunidat. Ounke fleksibel, ya ku hendenan pa siglonan largu a habitá e kostanan i a usa e rekursonan banda di kosta den e área karibense, kambionan di klima mundialmente, e preshon di e poblashon i rekursonan limitá ta peligrá un gran parti di e zona kostal. Esaki ta nifiká ku kambionan den e nivel di laman, eroshon di e kosta, inundashonnan i otro faktornan similar ta forma un gran riesgo.

E kambionan akí no tin solamente influensia riba e kostanan, pero tambe riba komunidatnan ku ta biba a lo largo di e área kostal. Pa atendé efektivamente ku e menasanan akí ta imperativo pa desaroyá i implementá plannan pa protehá e kostanan karibense. E konferensia aki ta tantu globalmente komo lokal di importansia. Zonanan kostal i e islanan chikitu rònt mundu ta haña nan mas i mas konfrontá ku problemanan similar i Boneiru ta djis un di e islanan ku mas i mas lo bai hañ’é konfrontá ku e kambionan aki den futuro. Akshonnan pa protehá nos kostanan ta eksigí ‘partnership’ i kooperashon. P’esei e konferensia tokante ‘Dinámika kostal’ ta un oportunidat pa ekspertonan den e área karibense topa otro i haña solushonnan duradero.
 

TAGS :
Comments
Change  
Total 0 comments.
Other Boneiru News

Instagram

5000 bubu aki den bo man!!! Ki bo di?? Www.facebook.com/mil.ku.sambil.korsou

A video posted by Ultimo Noticia (@ultimonoticia) on

Facebook
Archive Search
- -
La Prensa | Ultimo Noticia Online
© Copyright 2013 http://laprensaultimonoticia.com.