Breaking News :
  • NO BREAKING NEWS
Petishon pa pèrmit pa APK
2016-10-27 08:30:26 -
Boneiru
0
283

Gezaghèber di entidat públiko Boneiru ta partisipá ku mester entregá petishonnan pa pèrmit den kuadro di ‘Algemene Politie Keur’ i ‘buffetvergunning’ pa aktividatnan den e periodo di 19 di desèmber 2016 te 9 di yanüari 2017 pa mas tardá 25 di novèmber 2016 i pa aktividatnan di 10 di yanüari 2017 te 29 di yanüari 2017 pa mas tardá 16 di desèmber 2016. E departamentu di Asuntunan Hurídiko i General (JAZ) ta será for di 19 di desèmber 2016 te 30 di desèmber 2016.

Mester entregá i buska tur petishon i pèrmit na e departamentu di Asuntunan Hurídiko i General na Bulevar J.A. Abraham 27. Ta trata aki di entre otro petishon pa pèrmit pa organisá un entretenimiento públiko, un aktividat ku ta aksesibel pa públiko i/òf toka músika, por ehèmpel den kaso di aktuashon di gruponan di gaita, aguinaldo, barí i tambú. Ta trata tambe di petishon pa pèrmit pa bendementu di kuminda i bibida.

No ta duna pèrmit pa aktuashon di gruponan musikal na e siguiente sitionan: henter Kaya Korona, Ons hoekje na Kaya Avelino J. (Abechi) Cecilia, skina di Kaya L.D. Gerharts/ Kaya Lib. Simon Bolivar (antes Swiss Châlet i Super Corner), skina di Kaya Grandi i Kaya L. D. Gerharts (Centro), Kaya Nikiboko Nort i Sùit i Kas di Hadrei (Cosy Corner) na Kaya Minguel Pourier. Ta permití aktuashon na e kiosko na Plaza Fraternan di Tilburg solamente riba djadumingu, pero no durante e oranan ku ta tene santu sakrifisio di misa den Misa San Bernardo.

Minimalmente dos dia promé ku un aktuashon mester buta e departamentu di tráfiko di Kuerpo Polisial di Boneiru na altura di e aktuashon aki. Den kaso di un aktuashon na e kiosko na Plaza Fraternan di Tilburg mester partisipá esaki por lo ménos un siman adelantá na e departamentu di tráfiko di Kuerpo Polisial di Boneiru.

Gezaghèber ta partisipá alabes ku ta eksigí un pèrmit di benta pa empresanan (i similar) por bende i tira vürwèrk riba òf banda di kaminda públiko. Pa esaki interesadonan mester entregá un petishon pa mas tardá 25 di novèmber 2016 na departamentu di Asuntunan Hurídiko i General (JAZ) na Bulevar J.A. Abraham 27. Banda di e petishon pa e pèrmit aki mester buta Kolegio Ehekutivo (bestuurscollege) na altura di aktividatnan relashoná ku benta, almasenamentu i transporte di vürwèrk, esaki konforme artíkulo 3 di e ‘Vuurwerkbesluit Bonaire’.

Relashoná ku e gastunan di limpiesa esun ku ta hasi e petishon mester tuma kontakto adelantá ku Selibon N.V. (717-8159). Huntu ku e petishon mester entregá un prueba ku e gastunan di limpiesa òf un suma di garantia ta pagá.

E intenshon di e areglo aki ta pa haña un bista adelantá di e kantidat di aktividat ku ta bai organisá durante e periodo di 19 di desèmber 2016 te 9 di yanüari 2017 relashoná ku mantenshon di órden públiko, trankilidat i seguridat.

Pa hasi petishon pa e pèrmitnan mester hasi uso di un formulario ku ta optenibel na e departamentu di Asuntunan Hurídiko i General, situá na Bulevar J.A. Abraham 27 (antes ofisina di duana). Personanan ku a entregá un petishon pa pèrmit di APK i/òf un ‘buffetvergunning’ promé ku 25 di novèmber 2016 mester pasa buska e pèrmit aki pa mas tardá 16 di desèmber 2016 na e departamentu di Asuntunan Hurídiko i General na Bulevar J.A. Abraham 27.

Despues di 25 di novèmber 2016 no por aseptá petishon pa pèrmit pa aktividat den e periodo di 19 di desèmber 2016 te 9 di yanüari 2017.

Por haña informashon adishonal na e departamentu di Asuntunan Hurídiko i General, number di telefòn 717 5330 ekst 130 òf ekst. 271. 

TAGS :
Comments
Change  
Total 0 comments.
Other Boneiru News

Instagram

5000 bubu aki den bo man!!! Ki bo di?? Www.facebook.com/mil.ku.sambil.korsou

A video posted by Ultimo Noticia (@ultimonoticia) on

Facebook
Archive Search
- -
La Prensa | Ultimo Noticia Online
© Copyright 2013 http://laprensaultimonoticia.com.