Breaking News :
  • NO BREAKING NEWS
Gobièrnu den Silensio a akseptá desigualdat riba Boneiru
2016-10-31 07:46:47 -
Boneiru
0
355

Kralendijk- Djamars último, Senado di Parlamento Hulandes (Eerste kamer der Staten Generaal) a trata kambio den konstitushon Hulandes ku tin komo konsekuensia ku ta ankra Boneiru den Konstitushon Hulandes riba un base di desigualdat ku Hulanda i tambe demas partner den Hulanda i Reino. Apesar di opheshon opvio i amplio di pueblo di Boneiru kontra di e kambio aki, ta sumamente remarkabel kon Kolegio Ehekutivo di Boneiru den silensio a akseptá pa hasi nos pueblo siudadano di segundo rango riba nos propio tera.
Manera ta konosí, gobièrnu di Hulanda a indiká di kier hasi kambio den konstitushon di Hulanda ku e meta pa duna Boneriano e oportunidat pa indirektamente vota pa miembronan di Senado di Hulanda. Pero konsekuensia direkto di e kambio aki ta tambe ku lo ankra nos isla den forma di desigualdat den konstitushon Hulandes. E kambio aki ta duna gobièrnu di Hulanda legalidat konstitushonal i unilateral pa por hasi distinshon entre su habitantenan abase di desendensia òf si nan ta ubiká riba un di e islanan Boneiru, Saba òf Statia.

Silensio remarkabel
Djamars 25 di òktober último Senado di Hulanda a trata i aprobá e proposishon pa hasi kambio den Konstitushon i pa ankra Boneiru den Konstitushon Hulandes i abase di e desigualdat ku ta reina desde 10/10/10 riba nos isla.
Remarkabel ta ku siendo konsiente di e echo ku e lei aki a wòrdu poné riba agènda, gobièrnu di Boneiru no ta tuma ningun akshon. Kolegio Ehekutivo no ta manda karta pa Senado i ekspresá nan opheshon òf duna remarke. No ta aserká miembronan di Senado i lobi pa trese kambio den e situashon alarmante ku a surgi. Kolegio Ehekutivo di Boneiru den silensio ta sinta i akseptá sin remarke ku Hulanda unilateralmente ta skohe pa ankra nos Isla den desigualdat den Konstitushon.
Mes un djamars 25 di òktober anochi Konseho Insular ta den reunion. Na momento ku Konseho Insular ta den reunion ya kaba Senado na Hulanda a akseptá e kambio proponé. Akinan tambe ta remarkabel ku den Konseho Insular tampoko no tin niun movishon, krítika òf akshon pa e echo ku gobièrnu di Hulanda unilateralmente a skohe pa kontinuá ku e proseso i ankra nos isla den desigualdat den Konstitushon.

Para proseso di kambio di konstitushon
E ta aun mas remarkabel e silensio debí ku riba 26 di mei 2015 ta e mesun Konseho Insular aki a disidí pa informá gobièrnu di Hulanda ku mester para e proseso di kambio di konstitushon te na próksimo aviso. Komo diputado di Asuntunan Konstitushonal, Clark Abraham a guia e proseso i Kolegio Ehekutivo den un karta fechá dia 30 di mei 2015, a re-afirmá e posishon di gobièrnu di Boneiru pa para e proseso pa hasi kambio den Konstitushon te na próksimo aviso. Esaki aun mas teniendo kuenta ku un referendum ku a tene riba 18 di desèmber último i tambe e proseso di evaluashon ku ta andando. Si por rekordá, hasta tin un potrèt kaminda lidernan di frakshon huntu ku diputado di Asuntunan Konstitushonal sr. Abraham ta entregá e petishon aki personalmente den luna di yüni 2015 na Minister Plasterk na Den Haag. Awor por tuma nota ku apesar di tur esaki, Den Haag ta desviá for palabrashon ku Boneiru i aparentemente ku bendishon di e gobièrnu aktual.


Polítika di lembelansa
Nos por tuma nota ku e Kolegio Ehekutivo aktual sea no tin noshon di kiko ta pasando òf falta di kurashi pa atendé ku Den Haag na un manera responsabel den bienestar di nos pueblo. Apesar di un desishon di Konseho Insular desde 2015 pa duna nan sosten, diputado Statia i su Kolegio Ehekutivo no ta hasi nada pa kontra arestá e poder ku Den Haag kier ehersé riba nos pueblo.

Nos por mira e mesun polítika di lembe i tene Hulanda kontentu aki a kosto di nos pueblo den tur otro akto i relashon ku Den Haag. E gobièrnu aktual a ninga e reportahe hasí pa NIBUD djis pa komplasé Hulanda, desde ku e gobièrnu aki a sinta, Hulanda a baha e suma di Vrije Uitkering destiná pa servisionan pa nos pueblo ku miónes di dòler, apesar ku tin reportahe independiente ku ta mustra ku mester a hisa e montante aki ku 20%. E echo ta mustra ku gobièrnu di MPB tei pa lembe i protehá interes di Den Haag na lugá di Pueblo di Boneiru.

Trata den dos konstelashon
Debí ku ta trata un kambio di konstitushon, mester trata e proposishon pa kambio den dos diferente konstelashon di Parlamento. Esei ta nifiká ku despues ku trata e proposishon di lei i esaki wòrdu aprobá pa ámbos kamber di Parlamento Hulandes, mester bolbe trat’e despues di e próksimo elekshon pa Parlamento. Den e di dos proseso aki, mester di un sosten di por lo ménos dos terser parti (2/3) di ámbos kamber den parlamento pa por aprobá e kambio di lei proponé. Esaki ta nifiká ku e kambio no ta na vigor i ku esaki mester bolbe bini dilanti despues di elekshon di Parlamento na mart 2017 próksimo.

Akshon uní inmediato
E echo ku ta trata aki di derechonan fundamental di nos isla, polítikonan mester pone tur diferensia polítiko un banda i den forma unánime, forma un bloke na bienestar di Bonaire. Konseho Insular i Kolegio Ehekutivo mester por inmediato i na un forma konsistente tuma tur akshon nesesario i den e reto aki nos mester buska tur asistensia lokal òf internashonal nesesario den kualke forma pa evitá ku Bonaire ta wòrdu ankrá den un forma di desigualdat den Konstitushon Hulandes den e próksimo konstelashon di Parlamento Hulandes, konforme deklarashon di eks diputado di Asuntunan Konstitushonal, sr. Clark Abraham.

TAGS :
Comments
Change  
Total 0 comments.
Other Boneiru News

Instagram

5000 bubu aki den bo man!!! Ki bo di?? Www.facebook.com/mil.ku.sambil.korsou

A video posted by Ultimo Noticia (@ultimonoticia) on

Facebook
Archive Search
- -
La Prensa | Ultimo Noticia Online
© Copyright 2013 http://laprensaultimonoticia.com.