Breaking News :
  • NO BREAKING NEWS
A lo menos 23 morto i 17 hende ku a pèrde ora ku barku a kima na Indonesia
2017-01-03 07:43:52 -
International
0
287

YAKARTA.—A lo menos 23 persona a muri i 17 a disparsé den e kandela ku a sosodé djadumingu pasá, riba un barku di pasahero ku tabata transportá mas ku 200 persona for di Yakarta pa e archipiélago di e Mil Isla, dilanti di e kapital di Indonesia.
E ekiponan di reskate a logra salba 194 persona, algun di nan ku kimánan grave, segun datonan di e Hunta Nashonal Indonesia di Gestion di Desaster, publiká den e medio di e pais Detik.
Entre e sobrebibientenan tin 17 herido ku a hiba pa e hospital Atma Jaya di Yakarta, nan tur indones, di entre 18 pa 51 aña di edat, menos un mucha di 7 aña.
E sifra di mortonan a oumentá konsiderablemente for di e kuater fayesido ku a anunsiá en prinsipio, pasobra despues ku a paga e kandela por a hasi un investigashon mas amplio ora ku a tou e barku pa e haf Muara Angke di Yakarta.
Pagadónan di kandela i Krus Kora a kolaborá den e operashonnan di reskate i pagamentu di e kandela, ku a kuminsa ku un korto sirkuito di un generator den interior di e proa di e barku.
E barku, identifiká komo Zahro Expess, tabatin mas ku 200 persona a bordo, entre pasahero i tripulashon, riba un ruta pa e isla Tidung ora ku e kandela a kuminsá despues di a sali for di Muara Angke ora ku e barku tabata na un kilometer i mei di distansha for di tera.
E hefe di e departament di Bombero di nort Yakarta, Strbiadi Gunawan, a akusá kapitan di e Zahro Express, ku no a revelá su nomber, di a empeorá e situashon pa motibu na lugá di alertá e pasaheronan i dirihí e evakuashon, el a opta pa salba su mes.
“Kapitan di e barku a hui, el a bula”, segun un testigu.
E pasaheronan a tuma nota di e kandela pa motibu di e ola di kalor i huma pretu ku a kuminsá sali na e proa i plama rápidamente den henter e barku ora ku el a drenta den kontakto ku e depósito di kombustibel, segun testigunan ku a papia ku prensa.
E desaster marítimo mas grandi ku a sosodé den tempu di pas a tuma lugá dia 20 di desèmber na Filipinas i a kobra 4341 bida humano.
E aksident naval a sosodé ora ku e ferry MV Doña Paz, ku tabata sobrekargá di pasahero, a dal kontra e barku petrolero MT Vector i tur dos barku a kima mei mei di laman. Tabatin solamente 24 sobrebibiente.
 

TAGS :
Comments
Change  
Total 0 comments.
Other International News

Instagram

5000 bubu aki den bo man!!! Ki bo di?? Www.facebook.com/mil.ku.sambil.korsou

A video posted by Ultimo Noticia (@ultimonoticia) on

Facebook
Archive Search
- -
La Prensa | Ultimo Noticia Online
© Copyright 2013 http://laprensaultimonoticia.com.