Breaking News :
  • NO BREAKING NEWS
15 aña kastigu di prizòn pa homisidio Teenerparade
2017-07-11 08:26:17 -
Korte
0
12371

Willemstad – Djamars 11 di yüli Korte den Promé Instansia a sentensiá e hóben D.S.O. di 23 aña, nasé na Colombia, na 15 aña di prizòn pa homisidio di e hóben di 18 aña D’Xiane Ogenia. Tambe D.S.O. a keda sentensiá na pago di daño i perhuisio na famianan di e víktima.

D.S.O. a sali liber di akusashon di asesinato dor ku e dosié no tabatin sufisiente punto di referensha pa por a determiná ku ta trata di un akto premeditá. Ministerio Públiko ta kompartí e opinion aki. Korte ta haña pruebá ku e akusado a tira tres biaha riba e víktima ku un arma di kandela, ku konsekuensia ku e víktima a fayesé.

Korte a rechasá e defensa di e abogado ku tabata trata di ‘noodweer’ i ‘noodweerexces’, esta defensa propio. Korte a tuma den konsiderashon ku riba e imágennan di e insidente por a mira ku e komportashon di e akusado di kuminsamentu te final tabata di un manera agresivo i atakante den direkshon di esun ku a bira víktima i un amigu di esaki. For di momentu ku e akusado tabata kana den direkshon di esun ku a bira víktima i su amigu e komportashon di e akusado tabata pa inisiá un konfrontashon. E hóben ku despues a bira víktima ta esun ku a purba di evitá un eskalashon, pero e akusado ta provoká i ta kuminsá un pelea. Bou di e kondishonnan aki e akusado no por basa su defensa riba ‘noodweer’ òf ‘noodweerexces’.

Tambe Korte a konsiderá ku e homisidio aki no a afektá solamente e famianan direkto di e víktima, pero tambe el a shòk komunidat di Kòrsou inmensamente. E insidente a trese sintimentu di miedu, insiguridat i konsternashon. E víktima hóben a wòrdu matá durante di Karnaval di Kòrsou, despues di un Teenerparade bon bishitá. E parada aki ta organisá pa hóbennan. E tiroteo a tuma lugá den kurason di Kòrsou, na pia di brùg di Ponton, ku tabata hopi drùk na e momentu ei ku hóbennan i muchanan disfrasá i ku tabata fiestando ainda. Segun hues ku e tiroteo chokante i sin sentido aki e akusado a sòru pa un punto hopi hopi abou den kasonan di tiroteo na Kòrsou. Korte ta haña e echo ku e akusado a bai e Teenerparada, ku ta bon bishitá, ku un armá kargá i seguidamente a bebe un kantidat grandi di whisky i a konsumí mariwana algu repudiabel i ta trese peliger ekstremo.

Den e kastigu ku hues a imponé el a tene na kuenta ku e akusado ta kompletamente responsabel pa su aktonan. I tambe el a tene na kuenta ku ta trata di un homisidio ku a tuma lugá riba un manera imprudente sin ningun motibu durante Karnaval di Kòrsou den sentro di siudat di Willemstad, mei mei di hopi hende (hóben) den bisindario. Esaki ta hasi e kaso aki un di e formanan mas pisá di homisidio, segun hues.


Ministerio Públiko a pidi 16 aña di kastigu kontra e akusado.

TAGS :
Comments
Change  
Total 0 comments.
Other Korte News

Instagram

5000 bubu aki den bo man!!! Ki bo di?? Www.facebook.com/mil.ku.sambil.korsou

A video posted by Ultimo Noticia (@ultimonoticia) on

Facebook
Archive Search
- -
La Prensa | Ultimo Noticia Online
© Copyright 2013 http://laprensaultimonoticia.com.