Breaking News :
  • NO BREAKING NEWS
Orkan ku nomber femenino ta esnan mas mortal
2017-09-19 07:50:06 -
Lokal
0
147

 

Segun un estudio estadístiko ku investigadónan di e Universidat di Illinios na Merka a hasi, e orkannan ku ta karga nomber di hende muhé ta generá mas viktima mortal ku esan batisá ku nomber maskulino, pasobra e poblashon ta persibí nan komo menos menasante i komo tal, ta tuma menos prekoushon.

E estudio a tene kuenta ku datonan di mas ku seis dékada i a konkluí ku, en efekto, e tormentanan ku nomber di muhé a mata kasi dos biaha mas tantu hende.

Ounke ku e investigashon ta proponé pa kambia e método pa batisá e orkannan, e sientífkonan di e Sentro Nashonal di Orkan na Colorado ta sugerí simplemente pa e poblashon keda atento i asumi e menasa ku kada tormenta ta suponé, independientemente si e yama Sam of Samanta.

Opviamente ta asigná e nombernan den forma arbitrario i su peliger potenshal no tin nada di haber ku su nomber, pero tog e koinsidensia ta kurioso.

Kiji Jung, un di e sientífikonan ku a traha riba e estudio ta opiná: “Si hendenan ku ta ferwacht un gran tormenta ta husga su menasa a base di su nomber, anto e situashon ta bira realmente peligroso”.

E investigashon, ku a keda publiká den Proceedings of the National Academy of Sciences, a analisá e dañonan kousá pa e tormentanan tropikal na Merka entre 1951 i 2012.  For di e datonan a ekskluí orkan Katrina (2005) i Audrey (1957), tur dos femenino, por sierto, pasobra nan tabata muchu mas mortal ku un orkan promedio. (Audrey a mata 500 hende i Katrina 1833, esun mas mortal resientemente).

Segun e datonan, a sali na kla ku e orkannan ku nomber di muhé ta mata mas hende. Inkluso, esnan responsabel di e estudio ta sugerí ku si kambia nomber maskulino di un orkan, manera Charley, pa otro manera Luisa, e lo por kousa tres biaha mas tantu víktima pasobra inkonsientemente e hendenan ta husgué komo menos violento.

Esnan ku a ser interogá  i ku a pidi pa imaginá nan mes ku un orkan yamá Alexandra, Christina of Victoria tabata aserká, a pensa ku nan lo ta menos dañino ku nan ekivalente maskulino Alexander, Christopher of Victor.

Kuriosamente, en prinsipio e orkannan na Merka tabata ser batisá solamente ku nomber femenino, un práktika ku meteórologonan a konsiderá apropiá pa motibu di e naturalesa impredesibel di e tormentanan tropikal. E método di alterná nomber di muhé/homber a ser adoptá na final di añanan 70 pa evitá akusashon di sexismo.

                                                                                                                                      

 

 

      
TAGS :
Comments
Change  
Total 0 comments.
Other Lokal News

Instagram

5000 bubu aki den bo man!!! Ki bo di?? Www.facebook.com/mil.ku.sambil.korsou

A video posted by Ultimo Noticia (@ultimonoticia) on

Facebook
Archive Search
- -
La Prensa | Ultimo Noticia Online
© Copyright 2013 http://laprensaultimonoticia.com.