Breaking News :
  • NO BREAKING NEWS
MINISTER DI DESAROYO EKONÓMIKO TA KOMPROMETÍ KU SIMAN DI KULTURA, TURISMO I MARÍTIMO
2017-09-29 08:49:19 -
Aruba
0
264

WILLEMSTAD- Resientemente Gobièrnu di Kòrsou a anunsiá ku e tradishonal Siman di Kultura, selebrá e último siman di sèptèmber, e aña aki lo bira mas grandi, debí na e selebrashon simultáneo di Siman di Turismo i siman Marítimo. E siman a habri djadumingu último ku hopi festividat den nos sentro di siudat. Selebrashon ta sigui den ful swing i Minister di Desaroyo Ekonómiko ta komprometí ku selebrashon di nos Siman di Kultura, Turismo i Marítimo.

 

Pa Minister Martina e aktividatnan ta kuminsá djaweps na e wèrf dilanti di Museo Marítimo, kaminda e ta bai kompañá algun alumno di skol avansá pa e museo. Aki e studiantenan lo risibí splikashon tokante Kòrsou su historia i herensia marítimo. Esaki lo tuma lugá pa 8:15 di mainta. Seguidamente Minister lo dirigí su mes pa Megapir 1, kaminda lo e risibí e kapitan di e barku krusero ku ta bishitá nos riba e dia aki. Lo e hasi un opsekio na e kapitan i alabes lo e saludá e turistanan ku lo bishitá nos isla riba e dia aki.

 

Sin embargo, no por sende lus na kaya i laga kas sukú. P’esei Minister lo akudí tambe na e área di Renaissance hotèl, pa asina e gradisí personalmente e trahadónan ku ta laborá diariamente den sektor turístiko. Kon ku bai bin trahadónan den e sektor aki ta representá Kòrsoui tur turista ku rekomendá nos isla i/òf regresá, ta danki entre otro na nan, ku ta representá un parti importante di e produkto turístiko.

 

Pero na Ministerio di Desaroyo Ekonómiko mes tambe lo tin selebrashon. Durante henter siman lo tin un eksposishon chikitu interno, netamente pa krea e esfera di kultura. Pa djabièrnè 29, despues ku Minister kompañá un di dos grupo di studiante pa Museo Marítimo, e ta bai MEO pa presensiá un eksposishon interaktivo di yerbanan tradishonal di Kòrsou. Seguidamente Minister lo bai aeropuerto, kaminda e ta bai selebrá huntu ku Curaçao AirportPartners, pa despues e regresá MEO pa un sukulento almuerso krioyo ku MEO a laga prepará pa kolaboradónan di e ministerio. Na CTB tambe Minister lo hasi akto di presensia parti mèrdia pa tuma parti na e selebrashon ku lo tuma lugá serka nan. Pa 4’or di atardi Minister lo ta bèk na MEO pa e klousurá e siman ku su tim di MEO, kaminda lo e tin un sorpresa pa tur ku ta laborá na e Ministerio.

 

Durante dia riba djabièrnè, Minister lo tira un bista tambe riba e análisis ku e diferente departamentonan di MEO lo hasi pa loke ta trata e tema pa Dia di Turismo, stipulá pa e Organisashon Mundial di Turismo. T’asina ku e tema di e aña aki ta durabilidat i ta pidi organisashonnan rònt mundu pa para ketu na e impakto ku turismo tin riba e Metanan pa Desaroyo Duradero di Nashonnan Uní (SustainableDevelopmentGoals – SDG’s). Kada departamento di MEO lo skohe e SDG-nan ku nan ta kere turismo tin mas influensia riba dje, i nan lo eksponé esaki den nan departamento mes.

 

 

Ounke ku e selebrashon ta kaba pa loke ta trata e siman di trabou, Minister tin un último kompromiso riba djasabra 30. E kompromiso aki ta ku nos hendenan lokal i alabes turistanan ku ta bishitá nos. Minister mes lo sirbi nan personalmente na restorant Steak &Ribs na RiffortVillage. Un i tur ta bon biní pa disfrutá di e platonan i eksperensiá servisio di primera klase. Ta pidi esnan ku ke asistí pa kòrda reservá.

TAGS :
Comments
Change  
Total 0 comments.
Other Aruba News

Instagram

5000 bubu aki den bo man!!! Ki bo di?? Www.facebook.com/mil.ku.sambil.korsou

A video posted by Ultimo Noticia (@ultimonoticia) on

Facebook
Archive Search
- -
La Prensa | Ultimo Noticia Online
© Copyright 2013 http://laprensaultimonoticia.com.