Breaking News :
  • NO BREAKING NEWS
Cariñitos ta selebrá 30 aña
2017-10-16 11:05:50 -
Farandula
0
1012

Dirigentenan di Grupo Cariñitos a tene un konferensha di prensa na Topogigo snèk den kuadro di selebrashon di nan 30 aña di eksistensia.

 

Na e konferensha di prensa aki, e fundadornan, sr. Renato Boerleider, sr. Andy Eugenia i tambe lider aktual sr. Urvin Benita huntu ku e kmishon di Cariñitos a  trese dilanti e historia di Grupo Cariñitos, e metanan, e evenementonan i shownan ku a tuma lugá den transkurso di e añanan.

 

Grupo di aguinaldo Cariñitos a keda formá dor di dos bon amigu ku a lanta huntu den bario di Suffisant kendenan ta Renato “Nato” Boerleider i Andy Eugenia. For di aña 1986 e dos bon amigunan aki kada unu, ku nan ambishon i inspirashon, a bin na e idea pa kuminsa  duna lès di kuarta i kanto na hobennan di den bario. 

 

For di e lès di kuarta aki, Renato i Andy a bini na otro idea pa lanta un grupo di koro di Misa na Parokia di Suffisant. Tur atardi na e famoso brùg pegá ku Fatima i Xaverius College, Andy ku Nato a bin e idea pa nan lanta un grupo de aguinaldos. Tabata na e presiso momento señora Carla La Reine ku semper ta pasa via di e brùg ei bai kas, ku su inspirashon grandi, a para kòmbersá ku nan i a duna nan e nòmber Los Cariñitos. Asina e grupo a haña su nòmber i a forma ku hobennan di bario di Suffisant Grupo Cariñitos. 

 

Tantu Andy komo Nato tabata hoben an bayendo skol sin entrada;  nan tabata uza nan kreatividat i fantasia pa traha tamboranan di hèmber di rabu ku bòm di spòns. I asina e soño di e duo dinámiko a kristalisá te ku grupo Cariñitos a debutá, desèmber 1987 na kas di ansiano Villa Maria gratuitamente.

 

Cariñitos atrabes di añanan a presentá na diferente lokalidat komersial, privá i aktividatnan grandi. E grupo tabata konosí pa su prestentashon na Topogigo Snèk, Pamela Snack, Miros Video’s, asta na nos instituto di Korekshon SDDK.

 

Hopi grupo aktualmente aktivo di aguinaldos, nan lider i/òf integrantenan a sali for di kuna di Cariñitos, p.e. Los Originales, Ambiente Navideños, Los Paranderos, Pura Gaita. I pa e selebrashon di Cariñitos hopi di e gruponan aki ta bai uni pa selebrá en grande.

 

Awendia grupo Cariñitos ta bou di mando di otro gran lider Urvin Benita, kual e  mes tabata un di e integrantenan di Cariñitos ku a kuminsá pichon fo’i aña 1987.  Ku orguyo mester rekonosé ku grupo Cariñitos ta un di e úniko gruponan di aguinaldo ku a keda eksistí konsistentemente pa 30 aña largu, danki na e dedikashon i amor di Urvin Benita.

 

E selebrashon di 30 aña, no ta solamente pa Cariñitos su eksistensia pero tambe ta pa e balor ku e grupo a sa di duna prinsipalmente e temporada di pasku. E punto mas haltu di e selebrashon ta dia 25 novèmber 2017, na Klup di Shell i entrada ta gratis ya asina tur fanátiko por disfrutá i rekordá e piesanan ku Cariñitos a deleitá e pueblo di Kòrsou kuné durante 30 aña largu.

 

Riba e dia ey por konta ku presensia di fundador di Cariñitos te ku e aktual miembronan di  Cariñitos. Mas ku klaro grupo Cariñitos ta invitá hinter pueblo di Kòrsou pa ta presente, pasó e selebrashon aki niun hende no mag di pèrdè.

 

 

TAGS :
Comments
Change  
Total 0 comments.
Other Farandula News

Instagram

5000 bubu aki den bo man!!! Ki bo di?? Www.facebook.com/mil.ku.sambil.korsou

A video posted by Ultimo Noticia (@ultimonoticia) on

Facebook
Archive Search
- -
La Prensa | Ultimo Noticia Online
© Copyright 2013 http://laprensaultimonoticia.com.