Breaking News :
  • NO BREAKING NEWS
Tamara Nivillac, artista invitá na Universidat di na Alemania
2017-10-16 11:26:36 -
Farandula
0
835

Djarason siman pasá dia 4 di òktober a tuma lugá un evenementu ofishal den Arkadentheater na Universidat di Mannheim, Alemania. E anochi a wòrdú organisá pa profesora Dr. Eva Eckkrammer huntu ku studiantenan di fakultat Lingüístiko ku a bishiKòrsou e aña aki. Invitado speshal di e anochi tabata e kantante kurasoleño Tamara Nivillac ku a duna un tremendo konsierto den su lenga materno Papiamentu.      

 

Dr. Eva Eckkrammer ta profesora di Lingüístika i medionan di komunikashon na Universidat di Mannheim na Alemania. Den añanan 90 el a hasi un investigashon sientífiko na Kòrsou i Aruba i a doktorá na 1994 ku un tesis tokante e ròl di  tradukshon literario pa lenganan minoritario (manera Papiamentu). Durante su estadia i investigashon na Kòrsou Dr. Eckkrammer a krea un amor i konekshon imenso pa ku nos idioma Papiamentu, nos kultura i pais. P’esei na òktober di aña 2016 el a invita señora Ingrid ‘Ini’ Statia for di Kòrsou pa bini Mannheim pa asina duna un kurso intensivo na su studiantenan dje fakultat ku tabata interesá pa  siña e idioma Papiamentu. Un grupo di mas o menos 25 studiante a sigui e kurso i denter di korto tempu a siña skirbi i papia Papiamentu.

 

Na aprel di e aña aki e studiantenan a bishitá Kòrsou durante un biahe di estudio, inisiativa di Prof. Dr. Eckkammer. Huntu ku señora Statia, Prof. Dr. Eckkammer a hinka un programa kultural intensivo den otro kaminda pa dos siman largu e studiantenan a atkerí hopi konosimentu di arte, kultura i historia di nos pais. Nan a bishitá entre otro diferente museo, hardin di yerba di Dinah Veeris, galeria di Yubi Kirindongo i tambe nan a hasi un bishita na Parlamento di Kòrsou.                              

 

Riba djarason 4 di òktober 2017 e studiantenan ‘bou di guia di nan profesora, a organisá un evenementu den Arkadentheater na  Universidat di Mannheim den forma di un eksposishon i presentashon kaminda nan a kompartí ku un públiko grandi tur loke nan a siña, mira i eksperensiá durante nan biahe pa Kòrsou.         

               

E klousura di e anochi tabata na enkargo di e kantante kurasoleño Tamara Nivillac akompañá riba guitara pa otro yu di tera Stanley Clementina. E kansion “Hello” di Adele ku Tamara a tradusí na Papiamentu na 2016 tabata e promé kansion ku e studiantenan a skucha na Papiamentu I nan promé kontakto i impreshon di e idioma durante e kurso ku nan a sigui. P’esei tabata hopi speshal pa e  studiantenan ku  Tamara tabata tei presente i ku el a deleitánan ku entre otro su propio kansionnan na Papiamentu.              

 

Inolvidabel tabata e momentu final kaminda henter e sala a kanta na bos haltu e refran di e kansion klásiko i bunita na Papiamentu, ‘Atardi’.    

 

 

 

 

TAGS :
Comments
Change  
Total 0 comments.
Other Farandula News

Instagram

5000 bubu aki den bo man!!! Ki bo di?? Www.facebook.com/mil.ku.sambil.korsou

A video posted by Ultimo Noticia (@ultimonoticia) on

Facebook
Archive Search
- -
La Prensa | Ultimo Noticia Online
© Copyright 2013 http://laprensaultimonoticia.com.